بدأنا فى 12 من مارس 20012 يعني من سنتين تقريباً، عملنا حوالي 12 أغنية، أنا «بهاء” ومعايا «مو» وكنا بنلعب مزيكا دايماً فى أوضة مو وفى يوم واحد صاحبنا رسم على الحيطة فوق سرير مو وش واحد فقررنا أن الوش دا هيكون هو وش «مستر شارموفر» وعملنا أول أغنية إسمها A Chat in the Garden وبعدها عملنا أغنية البوكسر ولقينا ردود أفعال الناس عظيمة جداً على الأغنية فقررنا نشتغل على أغاني تانية ومزيكا مختلفة فعملنا أغنية ميكي وسيناي وبعد كدا «عز» إنضم لينا،
مو لعز.. كمل أنت يا عز أنا أعرف بهاء من زمان،”أحمد” موجهه كلامة ليا فاكرة فرقة Super Size اللى قولتلك عليها عز كان معايا فيها يعنى نعرف بعض من 2007 تقريباً. عز بيكمل كلامه لقينا أن إحنا الثلاثة تقريباً متفقين فى كل حاجة، واحد بيلعب درامز وواحد بيلعب جيتار وواحد بيلعب بركشن محدش فينا مغني بس غنينا وطلعنا أغاني ومزيكا حلوة ومختلفة بشهادة الناس كلها. وإحنا الثلاثة مشتركين فى كل حاجة بنكتب الكلمات وننتج المزيكا من الآخر إحنا جينا شلة هنفضل شلة وهنمشي شلة. بهاء: بصى الهدف بتاعتنا هو السعادة، شعارنا هو We are happy because of music وأهم حاجة إن الناس تتبسط لما تسمع مزيكتنا، تخيلي نفسك كدا وإنتى رايحة الشغل ومخنوقة ومتضايقة وتسمعى أغنية لينا زي مثلاُ «خمسة سنتي» غصب عنك مودك هيختلف وهتتضحكى لأنها حاجات بتحصل فى حياتنا كل يوم وهو دا هدفنا إن الناس تتبسط بمزيكتنا. أول ما سألت إشمعنى إسم شارموفرز وإيه معناه لقيت عز أول واحد رد علي بجملة وهو ليه لازم يكون ليه معنى؟ ليه كل حاجة فى حياتنا لازم يكون ليها بعد منطقى وعمق فكري؟ مش ضروري خالص والله مو: عموماً هو كان إفيه بينا زمان كأصدقاء وفضل معانا ملوش أى معني «هو كدا».
مخفتوش من رد فعل الناس على كلمات الأغاني زى البوكسر مثلاُ؟
طبعاً أول واحد رد هو عز، وقال «إيه المشكلة فى كلمة البوكسر؟ بهاء قال: الناس اللى بتضايق وتقول ميصحش وكدا دول ناس عندهم مشاكل داخلية ومكلكعين، بالعكس الطلاقة فى الكلام كانت من الحاجات اللى حببت الناس فينا، إحنا بنكلم بصراحة، إحنا خلينا الناس تقول بوكسر وشارموفر من غير متكسف أصلها حاجة عادية مش عيب يعني وبعدين الناس كلها بتلبس بوكسر فعادى يعني. والحمدلله الناس حبت صراحتنا ومزيكتنا.
أفكار الأغاني بتيجي منين؟
عز: حاجات حقيقة بنعيشها كل لحظة وكل دقيقة، بهاء هو اللى بيطلع بالفكرة والكلام فى الأساس. بهاء قال: هديكي مثال بسيط على أغنية من الأغاني زى البوكسر، تحسى كدا إن فى أيام ملهاش لازمة زى السبت أو الثلاثاء فبصحي فعلاً أحس إنى عايز أفضل بالبوكسر وإن الوقت دا طالب معايا آكل ماكدونالز فبيدور فى دماغي حوار بتركيز إني هطلب «كذا» ومش هطلب «كذا» وفى الآخر تلاقى إن هدفك إنك تبسطي نفسك بتأكلي حاجة بتحبيها وقاعدة براحتك فى يوم ملوش لازمة، الموضوع بسيط جداً هتلاقيه بيحصل لآغلب الناس. عندك مثلاً أغنية Sinai بتحكي اللى بيحصل بالظبط مع أى واحد مسافر سيناء، الموضوع أبسط من أى فلسفة وكلام كتير . وفىه كمان آخر أغنية لينا اللى هى «السيرك» ودى بتحكي عن الجامعة وعن الإختلاف بين الناس، تلاقى ناس جاية بعربيات وناس جاية بمواصلات، وواحد عامل فيها “جونجور” بيتكلم طول الوقت بالإنجليزي وهو مفيش أى حاجة فى دماغه. واللي متدين وهو أصلاً مش متدين ومعقد، دا غير بقي المثقفين اللي هما فاكرين نفسهم أكثر ناس بتفهم والباقى كلهم فشلة وجاهلين. ويضيف مو: أيوة اللى هما بتوع أنا بشرب قهوة سادة وسجاير لف وبيرة ستيلا وحاسس إن هو بس اللى ناجح ودا تلاقى النرجسية عنده عالية حبتين، وطبعا منقدرش ننسي البنات ولبس البنات اللى هما محجبات بس لبسهم مش بتاع محجبات واللي لابسين ومش لابسين.
شايفين موضوع المنافسة إزاى؟
بهاء: أى حاجة إحنا عملناها كانت نابعة مننا إحنا وبطريقتنا إحنا سواء بقي من كلمات أو موسيقي أو حتى تصاميم بوسترات من الآخر عملنا أسلوب حياة خاص بينا إحنا بطريقتنا إحنا فمقلدناش حد، والله بقى الناس عجبها اللى إحنا عملناه وقرروا يعملوا زينا أهلاُ وسهلاُ، أصل المزيكا دى مش حرب وكلنا بنكبر مع بعض. وعموماً المنافسة دى حاجة حلوة بتخلي الناس تشتغل وتبتكر علشان تكون الأحسن المهم متسرقش اللى موجود وخلاص.
الجديد عند مستر شارموفر؟
مو: لقينا عدد الفانز بيزيد جامد فقررنا تصوير أول فيديو كليب ودا هينزل قريب جداً وحالياً مركزين في نزول حفلات لايف، بهاء قاطع مو وقال: ولوسألتينى متوقع إيه من الحفلات اللايف هقولك إننا هنوصل للعالم كله. وعن سؤالي عن الألبوم رد عليٍ عز هيكون فى ألبوم قريب بس إحنا مركزين حالياً فى الحفلات اللايف.
بهاء
بغنى وبلعب إيقاع فى فرقة شارموفرز وبكتب الكلام، بلعب بركشن فى بركشن شو، بدأت أصلاً باركشنست، للأسف مفيش كتير فى مصر بيعلموا البركشن والطبلة إلا شوية فيديوهات على اليوتيوب، فقررت إني أفتح مكان علشان الناس تتعلم مزيكا جديدة بإحتراف بقالة حوالى 7 شهور إسمه بونجوز. بدأت مزيكا بإحتراف فى 2005 كنت بلعب فى فرقة إسمها The room وبعد كدا فى فرقة Super size ودى كانت فرقة بتلعب فى الغردقة وشرم الشيخ وبعد كدا لعبت مع كايروكي حوالى 7 سنين وأنا حالياً فى بركشن شو وقبل سنتين أنا ومو بدأنا الشارموفرز.
نفسى:-
إن كل فرقة يكون عندها الهوية الخاصة بيها، ولازم نكون منفتحين وبنسمع الفرق العالمية الأخري، أنا عندي قناعة إن أى حد مينفعش يبدأ من ولا حاجة، كلنا بنكمل بعض، مثال بسيط الموبيل دا مش إختراع دا تكملة إختراع التليفون العادي وهكذا. نكمل بس منسرقش. فالخطورة فى الفرق الجديدة إنها لازم تعرف هي بتلعب إيه وعايزة تسمع الناس مزيكة إيه مش طالعة تتبسط على المسرح وخلاص، أحنا للأسف عندنا فقر فى الذوق العام فلازم الفرق تححد هويتها علشان الناس متتلخبطش.
خلينا الناس يقولوا كلمة البوكسر وشارموفر عادي يعني
مو
درامر فى فرقة شارموفرز، منتج مزيكا، بغني وبساعد فى كتابة كلمات الأغاني، سبت الجامعة علشان مش مقتنع إني أدرس حاجة مش عايزها، والحاجة اللى بحبها اللي هي «المزيكا» للأسف فى مصر ملهاش معني. وأنا وأحمد يهاء أصحاب من زمان.
عايز:-
يكون فى إهتمام بالمزيكا فى مصر، وإن المزيكا يكون ليها معنى عند الناس وتتغير نظرتهم وحتى كلامهم «آلاتي أو مزيكاتي» نفس الكلام على الرقص يقولك دى رقاصة يا عم وكأنها حاجة عيب. فأنا بتكلم عن الظاهرة عموماً نفسي الناس تحترم من يقومون على تلك الأعمال بإحترام أكثر من كدا فالناس تفضل تقول دا مزيكاتي مزيكاتي وأول ما يتعرف بيبقي هيموت ويتصور معاك. لازم الناس تفهم إن المزيكا حاجة مهمة يعني مثلاً الدكتور أو المهندس لما بيحبوا يهدوا أعصابهم بيسمعوا مزيكا فمهنتي لا تقل أهمية عن مهنته إحنا بنكمل بعض، محتاجين نسافر وننفتح أكثر على الثقافات والحضارات الأخري. أخيراً أن يكون فى فمصر جامعة بتعلم مزيكا صح لأن دا كان السبب الرئيسي اللى خلاني أسيب الجامعة.
إحنا جينا شلة هنفضل شلة وهنمشي شلة
عز
بيز جيتار فى فرقة شارموفرز، بغني وبشارك فى كتابة كلمات الأغاني وفى المزيكا. بلعب مزيكا من حوالى 12 سنة، قبل شارموفرز لعبت فى العديد من الفرق. متخرج من معلومات وحاسبات مدرستش أى حاجة ليها علاقة بالمزيكا وأنا وبهاء أصحاب من 2007.
إحنا التغيير:-
مينفعش نطلب من الناس إنها تسمعنا، إحنا اللى لازم نتغير ونبتكر فنجبر الناس إنها تسمعنا، أصل مينفعش أفضل طول الوقت أشرب سجاير ومحبط بسبب أن الناس مش بتسمعنى، لازم نكون إحنا التغيير والجديد. هدفى عموماً أن ميكونش حد غير مبتكر فى مكان غلط بسبب الكوسة والوسطة. شايف إنم 90% من اللى موجودين فى مجال السينما والمزيكا وحتى فى الحكومات والمؤسسات المفروض يكونوا مش فى الأماكن دى. أصل هى مش دايرة مقفولة على اللى داخل فيها وإن هيجي وقت وهيطلع منها، مفيش عندنا ثقافة الإعتزال حتي فى الحكومات تلاقي واحد عنده 90 سنة ولسة فى مكانه ونفس الكلام فى المزيكا.
كلام مستر شارموفر بنعيشه كل لحظة وكل دقيقة
نحتاج يومياً لمعرفة كل ما يدور في العالم من حولنا فالأحداث تتلاحق في سرعة كبيرة والموضوعات تتنوع علي نحو بالغ وهناك في كل لحظة العديد من الأخبار والأحداث والموضوعات الجديدة في شتى المجالات التي تهم كافة أفراد الأسرة من نساء ورجال وأطفال وشباب
