البسكوتة والدحلاب 7: إنتي مدمنة للدحلاب وللألم!

مفيش حاجة تقريبًا بتعمل مشاكل ما بينكم، مفيش حاجة تغلى على الراجل إللي بتحبيه!

النظرية وراء كل المساعدات والدعم إللي بتقدميه للدحلاب إنه لو الموضوع نجح ممكن الراجل يتغير ويتحول لكل إللي بتتمنيه وده معناها إنك أخيرا هتنتصري في الحرب إللي كنتي بتخسريها طول عمرك مع أهلك.

 

وعلشان كدة بتيجي على نفسك وبتقدمي المساعدات والدعم والتضحيات وكل حاجة علشان يتغير زي:

– تشتري معاه الهدوم علشان شكله يبقى أنيق أكتر.

– تدوري على لايف كوتش أو طبيب نفسي ليه وتتحايلي عليه يروح.

– تساعديه ماليًا لممارسة هواياته أو حتى تجيبيله هدايا علشان تساعديه يشغل وقته.

– تروحي تعيشي معاه في مكان بعيد علشان هو مش مرتاح هنا.

– تساهمي في النفقات المالية أكتر مما المفروض تساهمي معاه.

– توفري مكان السكن أو تساهمي ماليًا في توفير مكان للسكن بأكتر من الحصة المعتادة للسيدات في بلدك.

– تسمحلي له يبتزك عاطفيا بحجة إنه محدش استحمله وإذا مكنش إنتي إللي تستحمليه وتحتويه مين هيعمل كدة.

– تساعديه في البحث عن شغل.

ده جزء بسيط من الطريقة إللي البسكوتة بتحاول تساعد بيها الدحلاب.. البسكوتة طول الوقت ما بتفكرش غير في طرق دعم وأساليب جديدة للتقرب من الدحلاب.

 

إنتي بتحاولي تقدمي الدعم والمساعدة وبتحاولي تظهري نفسك دايمًا بصورة الشخص الخدوم المتفهم لأن ده سلاحك الخفي للسيطرة والتحكم في الآخرين والطريقة إللي بتعرفي تملكي بيها الدحلاب خصوصا إنك عارفة إنه شخصية بتحتاج للتقبل والدعم علطول وسبب احتياجك للسيطرة والتحكم هو الخوف من الفقد والهجر والخوف إنك ما تاخديش منه الاهتمام الكافي.. إنتي خايقة الدحلاب يهجرك ويبطل يهتم بيكي زي ما كان أحد والديك أو كلاهما مش بيهتم بيكي وبيهجرك عاطفيًا وإنتي طفلة.

 

إنتي مدمنة لوجود راجل في حياتك بتحبيه ومدمنة للألم النفسي والعاطفي!

ستانتون بيلي مؤلم كتاب “الحب والإدمان”  بيتكلم عن العلاقات العاطفية الإدمانية وبيقول:العلاقة الإدمانية هي إللي بتقدر تفصلك عن الواقع بتاعك وبتسكن الألم وتقلل التوتر ومفيش حاجة تقدر تهدي الوجع وتعزلنا عن الواقع المؤلم أكتر من علاقة حب حلوة من نوع خاص زي العلاقت الإدمانية. العلاقة الإدمانية بتتحدد بحاجتين: أولا، الاحتياج الدائم والمستمر والمتزايد إنه الشخص ده يطمنك إنه موجود طول الوقت جنبك وأول ما يبعد عنك شوية بتتوتر علطول. ثانيًا: علاقتك بالشخص ليها تأثير على باقي مناحي حياتك زي شهيتك وشغلك وإنجازاتك وعلاقتك بالآخرين.

 

هوسك بالدحلاب هو الشي إللي بتتغلبي بيه على إحساس الألم والخواء والخوف والغضب.. إنتي بتستخدمي علاقتك بيه كمخدر علشان إنتي مش قادرة تواجهي الحقيقة العارية إللي جواكي من الطفولة لإنها مؤلمة.. شديدة الألم!  وكل مالعلاقة كانت أصعب ومهكلة أكتر كل ما كانت تأثيرها كمخدر أقوى وأعنف..

 

من غير ما يكون فيه دحلاب في حياتك بتواجهي أعراض الإنسحاب منفردة.. عادة بتحسي بأعراض جسدية مش بس نفسية: غثيان، تعرق، رجفة، تفكير مشوش، قلق، مود إكتئابي، أرق وعلشان مش قادرة تستحملي كل ده لوحدك ولإنك مش بتتعالجي يا بترجعي للدحلاب بتاعك تاني يا بتدوري على دحلاب جديد.

إيه الوجع ده بس!

 

 

 

 

 

شيماء الجمال

شيماء الجمال

عملت شيماء في مجالات مختلفة على مدار 15 عامًا مما ساعدها على الكتابة في تخصصات مختلفة مثل الحمل والأمومة، الريجيم والأكل الصحي والرياضة والعلاقات الإنسانية وعلم النفس واللايف ستايل بوجه عام. شيماء شريك مؤسس في مشروع "أنا حامل" وصاحبة هاش تاج #من_الكرش_للكيرفي الذي أطلقته بعد خسارتها 40 كيلو جرامًا من الدهون!

كل مقالات شيماء الجمال