10 حاجات محتاج تعرفهم عن مريض القلق النفسي  علشان تعرف تتعامل معاه

السطور القادمة محاولة لتقريب ما يشعر به مريض القلق النفسي علشان نقدر نتعامل معاه بشكل أفضل..

أولا بشكل مبسط إيه القلق النفسي ده؟
اضطراب القلق النفسي هو أحد أشكال الاضطرابات النفسية بتسيطر فيه مشاعر معينة على المريض هي القلق والتوتر والخوف.. في البداية بنحس بالقلق والتوتر بسبب حاجات هتحصل وبعدين بندخل في حالة شديدة من الخوف وعدم الاحساس بالأمان قد تصل للإصابة بنوبة هلع في بعض الأحيان. الأعراض مش بتكون نفسية بس في المشاعر، بتأثر كمان على الحالة الجسدية وبتسبب مشاكل كتير زي الأرق، سرعة ضربات القلب، العياط، رعشة الإيد، النهجان، ألم في الصدر، إمساك مزمن او إسهال، غثيان، إحساس دائم بالرغبة في التقيؤ، اضطراب شديد في الشهية، عدم تركيز، نسيان التفاصيل.
القلق النفسي مش زي مشاعر القلق والخوف العادية إللي بيحس بيها معظم الناس لما يكونوا تحت ضغط.. المريض بيحس بالقلق والخوف طول الوقت وساعات من غير سبب خالص حتى وهو نايم.
العلاج: علاج نفسي وجلسات- أدوية في كثير من الحالات- تغيير نمط الحياة وتعلم كيفية التعايش مع القلق والخوف..


ودي شوية حاجات بيحس بيها مريض القلق النفسي وبيعملها، لو عرفتها هتفرق كتير معاه ومعاك
1-بيحس بإنه عبء على الناس وبيكون مكسوف وبيلوم نفسه طول الوقت.. لإنه عارف إنه شخص غريب الأطوار وبيتصرف بغرابة وعارف إنه الناس مش هيفهموا تصرفاته وممكن يتضايقوا وبيعتذر كتير وبيخاف طول الوقت يزعل الناس.
2-ما بيحبش يرد على التيليفون والرسايل كتير خصوصا لما تكون كلها طلبات ولو حالته متأخرة هتلاقيه عامل التيليفون طول الوقت سايلنت لإنه رنة التيليفون أو فكرة إنه التيليفون بيرن بتوتره في حد ذاتها. لما تكلمه مرة وما يردش ابعتله رسالة قوله عايز إيه علطول، ساعات التواصل معاه بالكتابة كلمة ورد غطاها بيكون أحسن.
3-مش بيحب الخطط تتغير لإنه بيبذل مجهود نفسي كبير علشان يأهب نفسه على خروجة معينة أو إجتماع معين وبيفضل شايل همها.. الغاء الخروجات طول الوقت وتغيير مواعيدها والأماكن بيزود توتره.
4- بيتعصب وبيتوتر وبيخاف من حاجات لا تخطر على بالك وهتشوفها تافهة جدًا وساعات أصلا هو مش بيبقى عارف هو  ليه حاسس كدة.. ممكن فجأة موده يتغير تماما وبدون أي سبب واضح.. ما تستهترش بخوفه وتوتره لمجرد إنك مش لاقي سبب منطقي.
5-لما بيتوتر قوي وبيحس إنه بيفقد السيطرة خصوصا في التجمعات بيهرب.. بيدخل ينام، أو بيمسك الموبايل ويفضل يتكتك فيه، أو بيقوم يدخل الحمام، أو بيسكت أو حتى بيقوم يسيب القعدة خالص. هو مش متعمد يتجاهل الآخرين نهائيًا.
6-شخص ده غالبًا بيعاني من فرط التفكير السلبي Overthinking.. حاول ما تعملش تصرفات غامضة وما تديلوش رسائل متضاربة Double messaging  كتير علشان ده بيوتره جدًا.. بلاش جو النهاردة مهتم وبكرة مش مهتم.. اليومين دول بتكلمه كل يوم وبعدين تختفي، اليومين دول عايز تشوفه كل يوم وبعدين تتهرب من الخروج معاه.. ده طبيعي مع الناس العادية وطبيعي مع الناس إللي مش قريبة.. لكن مع شخص عنده توتر نفسي وقريب منك إنت كدة بتقتله بالبطئ، معلش حاول تخلي العلاقة -أيا كانت- فيها نوع من أنواع الاستقرار النفسي والروتين المريح بالنسباله.. علشان أول ما هتغير النمط المستقر ده، هيبدأ يتوتر ويحس إنك مش مهتم بيه ومش بتحبه وزهقت منه وعايز تبعد عنه.. هو للأسف بيفكر كدة خصوصا لو متوتر قوي.  لما تكون هتختفي أو هتبعد أو هتغير طريقة التعامل لإنك مشغول حاول تعرفة إنك هتعمل ده، هتريحه جدًا.. مثلا: معلش أنا اليومين دول مشغول علشان عندي تسليم مشروع على يوم الأربع هخلصه وهكون رايق.. أنا مودي وحش قوي النهاردة ومش قادر أتكلم هطلبك بكرة..
7-كل واحد عنده قلق نفسي بيبقى عنده شوية حاجات بتزوده، في الغالب هتعرفها بالوقت لو إنت قريب منه، حاول تخلي بالك منها، زي مثلا الصوت العالي قوي، بعض أنواع الموسيقى، الزعيق، السواقة بسرعة، مرواح أماكن جديدة لوحده، إضاءة معينة، صوت الكركبة والخروشة.
8- هيكون ليه كمان حاجات بتهديه لما يكون متوتر لو عرفتها وعملتها هتخفف عنه كتير..مثلا:  طبطبة على الإيد، حضن، كلمات معينة إيجابية بيتطمن لما يسمعها، نوع مزيكا معين بيهديه، خروجة معينة، مكالمة تيليفون هادية..إالخ
9- الصديق إللي عنده توتر نفسي مش شخص مناسب علشان يعمل معاك مشاويرك المرهقة، الزحمة، إللي فيها عمّال وفصال وجدل ولازم لما تتطلب منه خدمة تتأكد إنها حاجة مش بيتوتر وبيقلق منها.
10- مريض القلق النفسي ساعات بيبقى عنده أفكار وسواسية obsessive thoughts  ودي عبارة عن فكرة ملحة بيبقى عايز يعملها دلوقتي حالا حالا علشان يهدى، في الغالب بيبقى مجرب وعارف إنه ده بيهديه والفكرة بتفضل تسيطر عليه تماما علشان يعملها ولو ما عملهاش بيتوتر جدًا زي مثلا إنه يشرب سيجارة لو بيدخن أو ياكل حاجة فيها سكر أو يكلمك في التيليفون حالا لو إنت إللي بتهديه، أو ينزل من البيت فورًا، أو يمشي من المكان ده حالا.. الموضوع صعب عليك وعليه فحاول تتعاون لو تقدر.


مريض القلق النفسي شخص خايف، متوتر، حاسس بعدم الأمان طول الوقت.. مش مايص ولا بيتدلع عليك.. لو هتمرضه زيادة خد جنب بس على الأقل ما تلوموش ليل ونهار وما تزودش مشاكله وإحساسه بالذنب وما تزودش تعبه.

 

ملحوظة: المقالات المنشورة في قسم “رأي” لا تعبر عن وجهة نظر موقع النهاردة.